هندسة وصفية

نحن نرعي في مستوي لا محدود نتاثر بالأ شياء دون أن ندرك أبعادها الحقيقية




لكل فعل رد فعل .. هكذا قال نيوتن في قانونه الثالث, حدث ذلك في وقت لم يكن ذلك التقدم الدرامي في تكنولوجيا الاتصالات الذي نشهده حاليا يسمح له بأن يسمع عن ما يسمي بالعرب, و لو سمع لتراجع حتي عن قانونيه الأوليين و لعدل صيغة قانونه الأول لتصبح كما يلي :
يظل الجسم علي حالته الحركية(سكون تام أو حركة بسرعة ثابتة) الي أن يشعر بالملل.

و بما ان رانيا و طبيعي اننا نعرف انها مهندسة دون النظر الي ملف التعريف الخاص بها لأسباب هتبان بعد شوية, أقول بما أنها تركت لي التعليق التالي: "شدني أوي اسم هندسة وصفية أصل المادة دي كانت مجنناني في اعدادي و مش عارفة نجحت فيها ازاي " شعرت باتهام ضمني أنها ربما ادركت انني انسان خارق للطبيعة محب للهندسة الوصفية مكتشف لسرها الأعظم لدرجة اني لما دورت علي اسم لمدونتي لم أجد خيرا من هندسة وصفية. و كرد فعل لذلك :

عن الهندسة الوصفية أتحدث

لمن رحمته الأقدار أقول له تصر دوائر المعارف أن الهندسة الوصفية هو ذلك العلم الذي يبحث في معالجة طرق تمثيل الأجسام الهندسية علي سطح مستوي.
و يصر جميع طلبة الهندسة علي مستوي العالم أنها وسيلة غير مباشرة ليقول لك من هم أكثر منك خبرة أن الحياة التي نعيشها غير قابلة للفهم و التحليل فلا تجهد نفسك
و أصر أنا علي حصرها بعدة نقاص بسيطة:
- هناك نقط و مستقيمات و مستويات لا بأس
- المستقيم مصاب دائما بجنون العظمة فقط لأنه يترك أثرا في كل ما يمر به
- قد ترك أثر المستقيم في المستوي و لكنك أبدا لن تعرف طوله الحقيقي الا بالصدفة البحتة شديدة الندرة
-قد تكون قديما بما يكفي لتعلم انه هناك أسطح دورانية و أسطح بريمية و وصلات قابلة للإفراد

و المعلومة الأخيرة بالذات لعبت دورا مهما جدا في حياتي فقد قضيت سنين من عمري أسئل نفسي هذا السؤال المعضل كالمتاهات الإغريقية
اذا كان هناك وصلات فابلة للإفراد فهل معني ذلك أن هناك وصلات غير قابلة للإفراد و لكم حاولت الاجابة و اوشكت علي الجنون الي أن أقنعت نفسي بسخافة الفكرة كلها فأنا أصلا لا أعرف ما هي الوصلات.

هذا و لم تستطع أي مادة أخري أن تنافس دور الهندسة الوصفية في حياتي, حتي عندما أبلغنا دكتور نظريات العمارة في البكالوريوس أن ما نراه الآن في المعمار المحيط بنا هو نتيجة للنرجسية الحشوية الساخطة (اه والله) عذرته بشدة فجميعنا كان يعلم قصة هذا الدكتور.
فقد حدث أنه عندما كان في بداية حياته معيدا شابا وقع في غرام طالبة جميلة من علية القوم, و عندما استجمع شجاعته ليبلغها برغبته في القدم لها معتمد علي مكانته الاكاديمية و ماضيه العلمي المشرف و مستقبله الجامعي المبهر ضحكت بشدة, سالها : ليه بتضحكي؟ قالتله أصلها بصراحة نكتة انا اتجوزك انت ازاي يعني؟
مسكين لقد حاولوا ان يبلغوه الحقيقة عن طريق الهندسة الوصفية : لا تحسب انك بتفوقك العلمي سيكون لك شانا, ابدا لن تعرف قيمتك الحقيقة.
وعندما ادرك الدرس متاخرا قرر ان ينتقم من المجتمع كله في شخصنا فكان سؤاله في الامتحان كالتالي:

شهد القرن العشرون تطوراً ملحوظاً في سبل معالجة الكتلة و الفراغ , هذا بالتزامن مع ثورة صناعية تعتمد علي الحديد كمادة اساسية و الفحم كمحفز قوي و قد أدي ذلك الي بلورة كتل حادة مصمتة جاءت كإفراز طبيعي للنرجسية الحشوية الساخطة : تكلم عن عمارة ما بعد الحداثة في القرن العشرين في ضوء ما سبق.

بعد كل ده و لمن شعر أنه قد هرب من نداهة الهندسة الوصفية بعدم التحاقه بكلية الهندسة أقول له:

الطاقة لا تفني و لا تستحدث من العدم و لكن تتحول من صورة لأخري : هكذا قال اينشتاين - طبعا في وقت كان يعرف العرب و ربما ساعده ذلك في اثبات قانونه و ترسيخه فغالبا ما تتحول طاقة العرب كلها الي صوت عالي جدا.

و اليكم بعضاً من الهندسة الوصفية في حياتكم

قاتل الطفلين بالطالبية: كنت انوي قتل الطفل زياد انتقاما من والده و لم أكن أنوي قتل العسولة شهد.

علي جمعة مفتي مصر في البيت بيتك: حتي لو كان حفيد الرئيس قد بلغ الحلم فهو في الجنة.

13 التعليقات:

و بما ان رانيا و طبيعي اننا نعرف انها مهندسة دون النظر الي ملف التعريف الخاص بها لأسباب هتبان بعد شوية,
انا قلبت مدونتى رأسا على عقب عشان افهم الجملة اللى انت قلتها دى ما لاقيتش حاجة بتدل على انى مهندسة من غير ما نقرا ملف التعريف

ممكن توضح يا باشمهندس
مهتمة اعرف جدا
=====
اخحلى حاجة فى بوست الوصفية اللى انت كاتبه دة انه موتنى من الضحك لانه فكرنى بأيام ما كنت ادخل محاضرة الوصفية وبعد عشر دقايق اروح فى نوم وسبات عميق ما يصحنيش منه غير اللى قاعدين جنبى بيقولولى ان المحاضرة خلصت
=====
طلب كمان
ابقى كبر خط البوست عشان امثالى اللى فى سن الشيخوخة الثلاثينى
تحياتى لك والسلام عليكم ورحمة الله وبركاته

انا بس حبيت أسلم وهاجي تاني

فينك يا بشمهندس غيبتك طولت أوي

:) هو استفسارك يدل بما لا يقبل الشك انك مهندسة عديتي بمرحلة ما يسمي بالهندسة الوصفية.

طب و ليه يا بنت الناس تقلبي مدونتك راسا علي غقب
مكان كفاية تبصي علي السطر الي بعده

"و بما ان رانيا و طبيعي اننا نعرف انها مهندسة دون النظر الي ملف التعريف الخاص بها لأسباب هتبان بعد شوية, أقول بما أنها تركت لي التعليق التالي: "شدني أوي اسم هندسة وصفية أصل المادة دي كانت مجنناني في اعدادي و مش عارفة نجحت فيها ازاي "

يعني مش عارفة انتي نجحتي فيها ازاي و انتي في اعدادي طب

اتفضلي ارجعي مدونتك رتبيها تاني بقي
بس عطلة علي الفاضي

:) منشكر علي مرورك و طبعا هكبر الخط بس عشان خاطرك مع اني شايفه كدة اشيك

والله انتي الي غيبتي علينا يا ميمي
فين ميكروباصاتك
يلا مستنيين

أنا ليه في الهندسة إخواات يعني هههههههه
دة طبعاً لأنه أخويا مهندس مدني
أنما أنا عن نفسي في عالم الاداارة
حاسة سلاسة جميلة في كتابتك
بوست جميل

اسم المدونة فعلا مميز، و جميل إن حضرتك وضحت سبب تسميتها بهذا الاسم

و الحقيقة انى أرى الحياة فيها جزئين، جزء ممكن نفهمه، فنحمد الله على إنه أنار بصيرتنا، و جزء تانى ممكن مانقدرش نفهمه، فنرضى بقدر الله و نتوكل حسن التوكل

ربنا يعينك يا باشمهندس على الحياة و على هندستها الوصفية

تحياتى لحضرتك

تقبل مرورى

السلام عليكم

نعم أخى فنحن العرب دائماً
صوت وفعل مفيش
الايوجد نظريه تعكس الهندسه الوصفيه لحالنا الى الإيجابيه والفعل

ودمت أخى بخير

علي فكرة أنا بردة أخدت فكرة عنك انك عبقري .. أصل أحمد اخويا مهندس معماري ... وكان أرفنا بيها وبيشيلها كل سنة ... وعمره ما حبها .. وكل أصحابي كده ...

أنا بقي لقيت اسم مدونتك هندسة وصفية .. قلت يا إما يمكن خريج هندسة خاصة والنجاح بالكوسة .. يا إمـــأ عبقـــري

أما بالنسبة للميكروباص .. كل أما العدد يكمل وهطلع بيهم ... ينزل واحد ونقعد نتحايل عليه .. علشان يركب تاني !!!

يرضيك كده ... ماتخلي هندستك تهندس وتشوفلنا حل في الاستقالات اللي كل يوم بتتقدم دي....

جبلتلك صداع معلش أصلي بحب الرغي موووت

العوافي عليكو

(:
أنا كنت بحب المادة دي
(:
مش حب قوي يعني
بس ماكنتش بسترخمها زي أغلبية الطلبة
مع اني دلوقتي فيها لاأفقه شيئا
(:

قد تكون قديما بما يكفي لتعلم انه هناك أسطح دورانية و أسطح بريمية و وصلات قابلة للإفراد

(: وقفت كتير قووي عند الجملة دي
قديم أو حديث .. تفتكر هتفرق !
(:
بالمناسبة ...
الدكتور صاحب نظرية النرجسية الحشوية الساخطة
(:
ده أكيد لسه موجود في الكليه مش كده
(:
بس تقريبا بقى مستنسخ ...
لأن تلات ارباع الدكاترة بيمارسو علينا أنواع غريبة من التعذيب
أكيد مرجعها قصة مشابهة للي حضرتك قلتها
(:


بعيدا عن كل ده ..
استمتعت بالنص ...
تحيــــاتي

ميرام
انتي كنتي غالبا بتحبي الهندسة الوصفية من باب حب جلد الذات :)
علي فكرة كان معايا ناش شبهك في الكلية
و عايز اقولك طالب الهندسة الي بيحب الوصفية زي المواطن الي بيحب حسني بالظبط:)

بالنسبة لموضوع قديم ده فمعلوماتي انهم حذفوا نص المنهج في السنين الاخيرة بعد ما لقوا نسبة الانتحار زادت و بعد ما كان في سكشن كامل بيحضر في الخانكة

اكيد الدكتور ده في منه سلالة كاملة و موطنها الاصلي جامعة عين شمس تحديدا بس شوهد منه جماعات صغيرة في جامعات تانية

بالنسبة لاعجابك بالنص فمتشكر جدا و ده راي اعتز بيه من مشروع شاعرة كبيرة انشاء الله

دمتي بود و ابقي تعالي

واحد من العمال
والله لو لقيت النظرية دي ابقي قولي ينوبك فيا ثواب

هنا الرومانسية
عالم الادارة مش راكب مع ستوك الشاعرية الي في المدونة عندك
اهي دي في حد ذاتها هندسة وصفية

ههههههههههههههههههههه
والله العظيم
اقسم بالله
انا جاى المدونه
وشاددنى الاسم جدا
الهندسه
الوصفيه
يا خرابى
امتحانى بتاع الوصفيه كمان اسبوعين
وانا تعبان فى الماده دى جدا
لانى مذاكرتهاش اول باول
والدكتور
ربنا يحرسه
جاى من جامعه
نوتنجهام بقى
يعنى احنا بالنسباله
كلاب
وللاسف هو احسن مننا
عشان كده احنا مش بنفهم
انما هو
الله يكرمه
المدونه دى تحفه
تقبلى صديق معاك
مهندس صغنن
لسه فى بدايه مشواره
فى الفرقه الاعدادى
فى الكترونيات
و
مساء الخير
وصباح الفل